ხშირად ახალი მიმართულება თავიდან რთულად გეჩვენება, მაგრამ სწორედ ამ სირთულის გადალახვის შემდეგ ხვდები, რომ საკუთარ თავზე რაღაც ახალი, აქამდე უცნობი აღმოაჩინე. მათე რეხვიაშვილისთვის AI-ის სამყაროში შესვლა სწორედ ასეთი გამოცდილება აღმოჩნდა - ჯერ შიში, შემდეგ დაბრუნება, სწავლა და აღმოჩენა, რომ შეუძლებელიც შესაძლებელია.
მათე კომაროვის სკოლის მოსწავლეა. ხელოვნური ინტელექტის შესახებ შარშან გაიგო, როცა GAIA-მ ლექციების ჩატარება დაიწყო, თუმცა სწავლას წელს, კურსის მეორე ნაკადთან ერთად შეუდგა.
თავიდან AI მისთვის უცხო და საინტერესო შესაძლებლობა იყო, განსაკუთრებით იმიტომ, რომ საქართველოს ასპარეზზე ეს მიმართულება ჯერ კიდევ სიახლედ ჩანდა.
„როდესაც ვნახე, რომ საქართველოში ხელოვნური ინტელექტი ახალი წამოწყება იყო, მივხვდი, რომ ეს იყო ჩემი ასპარეზობის შანსი. როდესაც პირველად ვცადე ლექციებზე დასწრება, შემეშინდა მათემატიკის და თავი გავანებე, მაგრამ შემდეგ წელს ეს შიში დავძლიე და მივხვდი, რომ ყველაფერი გამოსვლადია.“
დღეს მათე ხელოვნური ინტელექტის სხვადასხვა ტიპის ამოცანებზე მუშაობს და ამბობს, რომ რაც უფრო მეტს სწავლობს, მით უფრო საინტერესო ხდება ეს სფერო მისთვის.
„მონდომებით ვსწავლობ ხელოვნური ინტელექტის სხვადასხვა ამოცანას. რაც მეტს ვსწავლობ, მით უფრო საინტერესო ხდება ეს ყველაფერი ჩემთვის და ვხედავ ამოხსნებს შორის ბევრ საინტერესო კავშირს.“
მათეს სუპერძალა ინტუიციაა - უნარი, უკვე დაგროვებული ცოდნა ახალ ამოცანაში გამოიყენოს და სწრაფად დაინახოს, რა შეიძლება იყოს სწორი გზა.
„ჩემი სუპერძალა სწორედ ინტუიციაა, რომლის დახმარებითაც ძველ ცოდნას მარტივად ვიყენებ ახალი ამოცანების ამოსახსნელად.“
ოლიმპიადაზე ინტუიცია განსაკუთრებით მნიშვნელოვანია, რადგან ხშირად ამოცანის პირობა პირდაპირ არ გეუბნება, რომელი გზა უნდა აირჩიო.
„ინტუიცია მეხმარება ამოცანის სწრაფად და ეფექტურ ამოხსნაში, რადგან მარტივად ვაკავშირებ პირობას შესაძლო ამოხსნებთან.“
საქართველოს AI ნაკრების წევრობა მათესთვის დიდი პასუხისმგებლობაა და, ამავდროულად, შანსი, საკუთარი ცოდნით ქვეყანა საერთაშორისო ასპარეზზე წარადგინოს.
„ნაკრების წევრობა ჩემთვის ნიშნავს შესაძლებლობას, რომ ვასახელო ქვეყანა საერთაშორისო დონეზე.“
IOAI-ზე მათესთვის შედეგთან ერთად, არანაკლებ მნიშვნელოვანია გარემოც.
„მინდა შევხვდე ჩემსავით მოაზროვნე ახალგაზრდებს, დავამყარო კავშირები, ვისიამოვნო ამოცანებზე ფიქრით და აღმოვაჩინო საინტერესო იდეები.“
მათეს ამბავი გვახსენებს, რომ წინსვლა ყოველთვის მარტივად არ იწყება. ზოგჯერ პირველი ნაბიჯი შიშის გადალახვაა, შემდეგ კი რწმენა, რომ რთული ამოცანაც შეიძლება გასაგები გახდეს. მისი სუპერძალაც ხომ სწორედ ეს არის - ინტუიციით იპოვოს კავშირები, ძველი ცოდნა ახალ გამოწვევას მოარგოს და გამოსავალი იქ დაინახოს, სადაც თავიდან მხოლოდ თავსატეხი ჩანდა.
თიბისი, ტექ ოლიმპიადების ჰაბის ფარგლებში, ახალგაზრდებს აძლევს შესაძლებლობას, საკუთარი ცოდნა და იდეები საერთაშორისო ასპარეზზე გამოსცადონ და პირველი მნიშვნელოვანი კარიერული ნაბიჯები გადადგან.
TBC Bank 2026 - All Rights Reserved